Bi nobela batean argitaratu ditu Harkaitz Canok

Idazle donostiarraren azken eleberria Silueta izenez kaleratu du Susa argitaletxeak. Canok berak adierazi duenez, “nobela tranpa” da, berez existitzen ez den eleberri bati buruz idatzitako 31 iruzkinek¹ osatzen dutelako. Azken batean, jolas literarioa proposatzen dio idazleak irakurleari: ezagutzen ez duen nobela bat imajinatzea hura zuzenean irakurri gabe, askotariko kritikariek idatzitako iruzkinetan bakarrik oinarrituta. Hortaz, irakurleak ez du zehaztasunez jakingo zer istorio kontatzen duen ezkutuko eleberri horrek, baina idazlea Ibarbia izeneko bat dela ondorioztatuko² du, baita bahiketa³ bat kontatzen duela ere. Bestalde, Canoren esanetan, iruzkingileei egindako omenaldi gisa ere har daiteke liburua: “Izan ere, esker txarreko⁴ lanik bada, kritikari izatea da”.

Arrate Egaña espekulaziotan

Zazpi istoriok osatzen dute Espekulazioak bilduma (Erein). Ipuin sorta honetan, egunerokotasun nahasia⁵ agertuko zaio irakurleari, eta era guztietako pertsonaiak: saguei higuina⁶ dien zientzia ikerlaria, estralurtar arrosak ezagutu dituen gaztea, presondegi mexikar bateko dokumentuak aztertuko dituen euskalduna, tabernako bezeroen elkarrizketak nahigabe entzuten dituen zerbitzaria, erlikiak aurkitzen dituen emakume boteretsua, ihesi dabilen korrikalaria eta mendekua⁷ nahi duen emakume taldea.

ERROEN IZERDIA
Jone Bordato
Elkar, 2025

Hiru ipuin luzek osatzen dute liburua: bikotekidearengandik bereizi⁸ eta galdurik sentitzen den emakumea; bi lagun gizonezko, euskalduna bata, espainola bestea, Pirinioetako ibilaldi batean; eta familiako sekretu bat gordetzen duten bi ahizparen elkartzea. Istorio bakoitza autonomoa da, baina guztiak hari batek lotzen ditu: protagonistek erroak⁹ iraganean finkatu¹⁰ arren, geroa zabalik da beti.

1. Iruzkin: kritika.
2. Ondorioztatu: deducir (es), déduire (fr).
3. Bahiketa: secuestro (es), séquestration (fr).
4. Esker txarreko: ingrato, -a (es), ingrat, -e (fr).
5. Nahasi: confuso, -a (es), confus (fr).
6. Higuin: asco (es), dégoût (fr).
7. Mendeku: venganza (es), vengeance (fr).
8. Bereizi: separar(se) (es), séparer (fr).
9. Erro: raíz (es), racine (fr).
10. Finkatu: fijar (es), fixer (fr).