Eguneroko1 formatuan bildu du Azedok bere eleberria, Elkar argitaletxeak plazaratua: Haizea Jauregibeitia protagonista Aizkorrieta herriko hondartzan desagertu zen, eta gertakariak zeresan ugari eman zuen, neska falta eta egun batzuetara aurkitu baitzuten bere egunerokoa, barruan Gerra Zibilaren garaiko txanpon bat gordeta zuela. Ertzaintzak ikerketa abiatu zuen, baina emaitza argirik gabe. Bestelako froga materialik lortu ezinik eta egunerokoan ageri denaren fidagarritasuna zalantzan jarrita, amaitutzat jo zuten kasua. Haizearen familiak, ordea, haren egunerokoa argitaratu du orain, irakurleren batek familiari jakinaraz diezaiokeen aztarnaren2 bat lortzeko itxaropenez. Liburua, beraz, neska desagertu aurreko azken zazpi egunen kronika zehatza da, Haizeak berak idatzia.
1. Eguneroko: diario personal (es), journal intime (fr).
2. Aztarna: pista (es), piste (fr).
HEZUR BERRIAK poesia liburua kaleratu du Ane Labaka Maiozek, Susa argitaletxearekin. “Zorionak, jakin dut hezur berriak dauzkazula” idatzi zion lagun batek Labakari, haurdun zegoela jakin zuenean, baina, egileak azaldu duenez, ez da amatasunari buruzko liburua. Ospitale hotz batean barruratutako hatzak, eta barruratutako hitzak, erruak, damuak, jaioberriaren arnasa etxeko bihurtuta... Nola egiten dute besteek? Denak bildu ditu idazleak bere lehen poema liburuan.
AZPIJOKOA AZPIAZUN
Iñaki Dorronsoro Maioz
Erein, 2025
Lapurretak, ustelkeria, lagun baten hilketa... Zer gertatzen da Azpiazu auzoan? Isilik egoten ez dakien kazetaria eta detektibe zaildua3, irakurleak horiexek izango ditu bidaide: Miren eta Alfontso. Jantzi kapela, hartu ohar bloka eta murgil zaitezte kale ilunetan, arratoien eta kriminalen artean, estolda4 zuloaren amaieraren bila. Izan zaitezte ongi etorriak gure hirira. Populazioa, atzokoa ken bat.
3. Zaildu: curtido, -a (es), aguerri (fr).
4. Estolda: alcantarilla (es), égout (fr).
GAUA HARAGO BULTZATUZ
Mario Calabresi
Itzulpena: Lurdes Auzmendi eta Koldo Biguri
Igela, 2025
Ez fikziozko lan honetan, Mario Calabresi kazetariak bere aitak, Luigi Calabresi poliziaburuak, jasan zuen jazarpena kontatzen du: ezker muturreko talde batek erail zuen 1972an, Milango komisaria batean anarkista bat leihotik behera erori eta hil ostean. Ikuspegi pertsonaletik aztertu ditu semeak aitaren kontrako atentatuaren aurreko eta osteko gertaerak.
