Elkar argitaletxeak kaleratu du idazle bizkaitarraren liburu berezi hau. Jaiok pentsamendu laburrak bildu ditu, hiztegi baten antzera antolatuta, Atik Zra. Irakurleak egileak urteetan jorratutako¹ testuak topatuko ditu bertan, hainbat idazmoldetan²: lerro bateko aforismoak, apunteak, poema antzeko pasarteak edo orri bateko gogoeta landuak. Bestalde, mota askotako gaiak bildu ditu idazleak: ametsak, burutazioak, giza harremanak, isiluneen pisua, kalean ikusitako eszenak, adiskideen pasadizoak³, umetako oroitzapenak… Horiekin batera, barrura ere begiratu du, ordea, eta bere buruaren erretratu gisakoa eskaintzen dio irakurleari, sotila eta intimoa. Idazkerari dagokionez, hurbiltasunez aritu da, arintasuna eta sakontasuna konbinatuz, batzuetan poetiko, besteetan zorrotz.

Karlos Linazasoro, umore beltzez

Düsseldorfeko txibatoa (Erein) da Karlos Linazasororen azken liburua. Karl izeneko alemaniar zorrotz eta obsesiboa da protagonista, Espainiako hegoaldeko auzo baten egunerokoa kontatzen duena: kaleetako auto gaizki aparkatuak, parkeko iturri kutsatuak, manifestazio zaratatsuak, auzokideen utzikeria⁴… Pasarte barregarriak eta mingarriak tartekatzen⁵ dira, bizitzaren miseria eta mundu groteskoa umore beltzez erakusteko. Hala, hausnarketa sozial gupidagabe, ironiko eta ausarta egiten du Linazasorok.

ENARAK
Bernardo Atxaga
Pamiela, 2025

Urtain boxeolaria da nobela honetako lehen pertsonaia. Lau narratzaileak, berriz, deabruak dira, eta gauzak kontatzeko oso modu berezia dute. Adibidez, batek dio Arroagoia inguruko mendiak “poliberdeak” direla. Bada, beldurrik gabe esan daiteke irakurleak “poliatseginez” irakurriko duela liburua: suspensea, umorea, sakontasuna, lengoaiaren⁶ erabilera arina, ausardia... aurkituko ditu.

1. Jorratu: landu, garatu.
2. Idazmolde: idazteko modu, idazkera.
3. Pasadizo: anekdota.
4. Utzikeria: dejadez (es), laisser-aller (fr).
5. Tartekatu: intercalar(se) (es), s'intercaler (fr).
6. Lengoaia: hizkuntza.