Argentinako Patagoniak sona handia du: mendiak, aintzirak, basoak, tokiko janari goxoa eta abar. Hori guztia Barilochen aurki daiteke, eskualdeko herririk bisitatuenetako batean. Marcos Tedin.

Argentina munduko zortzigarren herrialderik handiena da, eta bertan askotariko paisaiak aurki daitezke: mendiak, basamortuak, elurra, hondartzak eta zingirak, besteak beste. Hego Amerikako herrialde hau bisitatzen duenak badaki aste eskas batzuk ez direla nahikoa paraje horiek guztiak ezagutzeko. Patagoniara jo, Buenos Aires hiriburuan geratu, Iguazuko ur jauziak ezagutu, basamortua zeharkatu… gauza asko dituzte egiteko turistek, baina denbora gutxi. Hori dela eta, hautaketa egin beharra dago, eta askok Bariloche aukeratzen dute.