Chieti-Pescarako (Italia) Gabriele d’Annunzio Unibertsitateko Psikologia Sailak pertsona ezkertiak ikertu ditu. Izan ere, baliabide gehienak eskuinentzat prestatuta daude, munduko biztanleen ia % 90 direlako; beraz, hautespen¹ naturalak zergatik ez du lortu ezkertiak desager­tzea? Biologoen buruhauste² hori Gabriele d’Annunzioko ikertzaileek argitu dute: ezkertiak askoz lehiakorragoak³ dira, Scientific Reports aldizkariak argitaratu duenez. Lateralitatearen, sexuaren eta lehiakortasunaren arteko lotura ebaluatzeko 1100 inkesta baino gehiago egin ostean, emaitzek argi erakutsi dute ezkerrek “hiperlehiakortasun” askoz handiagoa eta antsietatea kontrolatzeko joera⁴ txikiagoa dutela. Ondorioa da garaipen-egarri hori ezaugarri psikologiko sakona dela eta ez duela loturarik trebetasun⁵ fisiko handiagoekin.

1. Hautespen: selección (es), sélection (fr).
2. Buruhauste: quebradero de cabeza (es), casse-tête (fr).
3. Lehiakor: competitivo, -a (es), compétitif, -ive (fr).
4. Joera: propensión (es), propension (fr).
5. Trebetasun: aptitud (es), aptitude (fr).