Zuzendaria: Franck Dubosc. Gidoia: Franck Dubosc, Sarah Kaminsky. Aktoreak: Franck Dubosc, Laure Calamy, Benoit Poelvoorde, Joséphine de Meaux. Frantzia, 2024.
Istorioa: Frantziako Jura eskualde menditsuko herri txiki batean, Gabonetako zuhaitzak saltzetik bizi dira Michel eta Cathy senar-emazteak, portaera arazoak dituen 12 urteko semearekin batera. Gabonak iristear, etxerako bidean Michelek hartz bat harrapatuko du ia-ia, baina animalia saihestean beste auto bat joko du eta bertako bi bidaiariak hilko ditu nahi gabe. Hildakoen ibilgailuan dirutza topatuta, senar-emazteek gorpuak ezkutatzea eta dirua gordetzea erabakiko dute, zorretan1 itota baitaude.
Onena: Hasiera bizia du, erraz harrapatuko gaituena, eta lehen minutu horietatik aurrera ere, nahiz eta hasierako bizitasuna galdu, aise2 jarraituko diegu Michel eta Cathy senar-emazteen eta gainerako fauna xelebrearen ibili are xelebreagoei. Ez da aparteko filma, baditu bere gorabeherak, baina komedia beltz entretenigarria da, ikusteko atsegina eta tarteka une dibertigarriak eskainiko dizkiguna. Giza paisaia berezi horretan, bestalde, Laure Calamy-ren (Cathy) eta Benoit Poelvoorde-ren (herriko jendarmeen burua) lanak nabarmentzekoak dira.
Txarrena: Komedia beltza bada ere, iluntasunetik gutxi du. Pertsonaia guztiak samurtasun handiz marraztuak daude; hainbeste, ezen3 gaiztoek ere ez diruditen hain gaizto (krudel eta zitalak izan arren). Coen anaien Fargo bikaina aipatu izan dute zenbait iruzkinetan, eta elur eta heriotza artean gogora etor dakioke ikusleari. Haatik, elurraren zuritik eta odolaren gorritik harago, batere zerikusirik ez. Honako film honetan ez duzue topatuko, inondik inora, Fargoko tragedia, patetismo eta krudelkeria nahasketa gogoangarria.
Eñaut Mitxelena
1. Zor: deuda (es), dette (fr).
2. Aise: erraztasunez, zailtasunik gabe.
3. Ezen: que (es), que (fr).
