Hirukote gipuzkoarraren lehen albumak sustraietara1 darama entzulea. Batetik, taldekideek beren haurtzaroko erreferentzia ugariak eta oraindik ere aurkitzen dituztenak ezagutzera gonbidatzen dute. Bestetik, “mugarria2” da disko hau taldearen ibilbidean, Oso Polita diskoetxearen hitzetan (berak kaleratu du lana), “gutxi baitira gai euskal folklorearen sustraien eta orainaren arteko hain zubi sendo eta originala eraikitzeko”. Lagunen abesbatzaz gain, kolaborazio asko izan dituzte lana ontzeko: Maixa Lizarribar, Kiliki Frexko, Maddi Oihenart, Juantxo Zeberio, Hekhtor Viñas, Bixente Martinez... Morroxko kantarekin egin dute diskoaren kontzeptua islatzen duen bideoklipa, Hernaniko parranda gau dibertigarri bat kontatzeko arin-arin erritmoan.
1. Sustrai: origen (es), origine (fr).
2. Mugarri: hito (es), événement marquant (fr).
MARRUMAKA jaialdia ospatuko dute, urriaren 4an eta 5ean, Sarako leizeetan, Sarako Lezeak-ek eta Usopop diskoetxeak antolatuta. Atzoko, gaurko eta biharko mitologiak ospatzeko ekitaldia izatea nahi dutenez, asteburua besta3 herrikoi moduan prestatzen ari dira: musikak, dantzak, mintzaldiek eta hainbat hitzorduk osatuko dute egitaraua. Bertan izango dira This is the kit, Mabe Fratti, Ezezez, Los Sara Fontan, Kaskezur, Gorka Urbizu, Ibil Bedi, Penelope Trappes eta Lumi.
3. Besta: festa, jai.
INPERNUKO
Xabi Solano Maiza
Elkar, 2025
Lan honek, biniloan bakarrik argitaratu denak, Solanoren ibilbideko une gorenak jasotzen ditu, hala nola Esne Beltza taldearen Esne zopak, Gora! eta Bi, eta bakarka grabatu zuen Ereñotzu diskoetatik berreskuratutako piezak. Gainera, plazaratu gabeko beste bi doinu gehitu dira: Zirrara konpartitu bat eta Dantza zati bat. Azken hori Jon Maiaren Gazta zati bat dokumentalerako sortutakoa.
HIRI ILUNEN UMEAK
Sara Azurza
Egilea editore, 2025
Azken urteotan definitu duten hiru hitzak erabili ditu Azurzak diskoari izena jarri eta heldutasunaz, gaztetasunaz, gauaz, heriotzaz eta maitasunaz abesteko: zortzi kantu, Azurzak berak sortutako musika eta hitzekin. Olaia Inziarteren eta Janus Lesterren kolaborazioa izan du, Begietan eta Zure behatz artean kantetan. Bilboko El Tigre Studios-en grabatu du, Jon Agirrezabalaga soinu teknikariarekin.
