Pantxoak eta Peiok hilaren 21ean jasoko dute Adarra saria

Bikote lapurtarrak¹ Victoria Eugenia Antzokian eskuratuko du saria, Donostiako Udalak eta Donostia Kulturak emanda. Ondoren, kontzertua eskainiko du. Odile Kruzetak, Edurne Otamendik eta Gorka Iribarrek osatutako epaimahaiak apirilean erabaki zuen 2026ko Adarra saria Pantxoa eta Peiori ematea, hainbat arrazoirengatik: 60ko hamarkadatik “kantuaren plazera” hainbat belaunaldirekin² partekatu dutelako, erresisten­tziazko himno bihurtu ziren protesta-kantak plazaratu zituztelako, Ipar eta Hego Euskal Herriaren arteko zubi-lana egin dutelako, garai zailetan euskal musikarako funtsezkoa³ izan den oinarrizko azpiegitura⁴ emankorra abiatu zutelako...

MAGALA
Haize-arrosa
Baga-Biga, 2025

Oraingoan, folk estilo puruagoa dakar taldeak, baina beste estilo batzuez aberastuta: rumba, country, balkan... Ez da emakumeen hainbat belaunaldiren arteko loturari buruz bakarrik hitz egiten, baina emakumearekin, tradizioarekin eta transmisioarekin sakon lotutako hamar abesti dira; norberaren esperientzietatik, emozioetatik, borroketatik eta kezketatik jaio dira, eta bakoitzak mezu bat darama.

LURPEKO TRENBIDEA
I. Etxarri & Bele
Egilea editore, 2026

Iñigo Etxarrirekin batera egin du Belek 14 bertsioz osatutako lana. AEBetako The Underground Railroad sare solidarioaren inguruan egindako bidaiaren emaitza da. Sareak hegoaldeko plantazioetatik iparraldera ihes egiten laguntzen zien esklaboei. Haien oinordeek⁵ sortu eta zabaldutako doinuak omentzen saiatu dira disko honetan, hango artisten kanten ber­tsioak eginez.

1. Lapurtar: Lapurdiko biztanle.
2. Belaunaldi: generación (es), génération (fr).
3. Funtsezko: fundamental (es), fondamental, -e (fr).
4. Azpiegitura: infraestructura (es), infrastructure (fr).
5. Oinorde: heredero, -a (es), héritier, -ère (fr).