Amaia Castorene
Sukaldaria eta kronikaria
Geografia eta Historia ikasia, irakaslea, sukaldaria, blogaria, bertsotan gai jartzailea eta Kanaldude telebistan kronikaria da Castorene (Baigorri, 1988). Sukaldaritzan eta elikaduran ere trebatua, horiek ditu egun jardun nagusi: Apetitu on blogean eta sare sozialetan errezetak sareratu, ikastaroak eman, sukaldari pribatu aritu... Finean, saltsa askotako perrexila: “Gauza bakar bat eginez aspertu egiten den pertsona naiz”. Eñaut Mitxelena. Argazkia: Amaia Castorene.
Ez duzu edozein motatako sukaldaritza sustatzen.
Niretzat, kozinatzea edo, batez ere, geure burua elikatzea ez da ekintza arrunta. Askotan, ez diogu behar besteko inportantzia ematen. Elikadurak osasuntsu mantendu behar gaitu, geure beharrei erantzun behar die. Hortik harago, egiten ahal dugun ekintzarik politikoena zer jaten dugun hautatzea da, nori erosten diogun, nondik datorren, sasoikoa den, ekologikoa... Hautu horiek guztiek sistemaren kontra egiten dute, azkenean errazagoa delako supermerkatura joatea eta geure buruari galderarik pausatu gabe saskian edozer gauza sartzea. Etxe ondoan ekoiztutakoa erostea, bitartekaririk1 gabe, sasoikoa jatea... zaila da, baina hautu politikoak dira eta horrela lortuko dugu bai bertako ekonomia sustatzea bai laborariak haien lanaz duinki2 bizitzea.
Modu osasungarrian elikatzea ezkortasunez ikusten da askotan. Baina hala elikatzea gustura jatea ere izango da, ezta?
Bai, hori da sekretua. Ez zait iruditzen era osasungarrian jatea zama denik edo horregatik neure buruari gauza batzuk debekatzen dizkiodanik. Sarritan, oporretan, adibidez, gauza ezberdin asko probatzen ditut eta asko gozatzen dut. Baina, era berean, badut gogoa etxera bueltatzeko, badakidalako ongi sentituko naizela osasungarriago janez; gorputzak eskatu egiten dit. Egunero jaten dudanaz gozatzen dut, saiatzen naizelako zapore askorekin, espezia askorekin... kozinatzen. Horrela jatea plazer hutsa da, ez dago frustraziorik, eta plazerari esker iraun dezakezu bizitza osoa osasungarri jaten.
DI-DA BATEAN
Zerk alaitzen dizu eguna? Eguzkiak.
Eta tristatu? Lan gehiegi izateak.
Zerk eragiten dizu barrea? Edozerk.
Eta negarra? Istorio politek, maitasun istorioek.
Zerk haserrearazten zaitu? Egoismoak.
Bizio bat? Izozkiak.
Plazer txiki bat? Irakurtzea.
Plazer handi bat? Kirola.
Zer izan nahi zenuen txikitan? Janari denda bateko saltzaile, makinarekin barra kodeak klikatzeko.
Eta orain, zer ez zenuke izan nahi? Autoritatea duen edozer: buruzagi, polizia, lehendakari...
Jateko gustuko duzun jaki bat: Pikua8.
Batere gustuko ez duzun bat: Haragia.
Osagai bat: Espeziak.
Gosaria, bazkaria ala afaria? Afaria.
Zer ez da inoiz falta zure izozkailuan? Jogurta, frutak eta arrautzak.
1. Bitartekari: intermediario, -a (es), intermédiaire (fr).
2. Duinki: dignamente (es), dignement (fr).
3. Gehiegikeria: exceso (es), excès (fr).
4. Gizen: grasa (es), gras (fr).
5. Goraipatu: elogiar (es), louer (fr).
6. Hur: avellana (es), noisette (fr).
7. Fite: azkar, bizkor.
8. Piku: higo (es), figue (fr).
