ELEZ 26ko irabazleak, ezagutzear

Ekainaren 2an jakingo ditugu ELEZ 26. Mea­tzaldeko izkribu¹-lehiaketako irabazleen izenak. Joan den maiatzaren 8an amaitu zen lanak aurkezteko epea, eta edizio honetan 95 idazki jaso dira Meatzaldeko AEKren euskaltegietan. Bi arlo edo kategoriatan bana­tzen da txapelketa: librea eta Meatzaldeko euskaltegietako ikasleena. Bada, lehen kategorian, 18 lan aurkeztu dira (azken urteetan kopurua gorantz doa, poliki-poliki); ikasleen arloan, berriz, maila guztietako 77 idazkik hartu dute parte.
Sariak ezberdinak dira kategoria bakoi­tzean. Txapelketa libreko irabazleak Argizaiola eta 400 € jasoko ditu; Meatzaldeko lehen sail­katuak, 200 €; eta bigarrenak, 125 €. Ikasleen artean, berriz, A1 mailatik C1 mailara arteko txapeldunek tableta bana² jasoko dute; eta B2 eta C1 mailetako txapeldunordeek, aurikularrak. Bestalde, edizio honetan izan da beste sariketa bat ere: Elez Korrika, Korrika hizpide³ duen atal berezia; horren irabazleak ere tableta eskuratuko du. Hori bai, parte-hartzaile guztiek jasoko dute ELEZ 26. Meatzaldeko izkribu-lehiaketako aurtengo oroigarria⁴. Sariak banatzeko ekitaldia Abantoko Ekoetxean egingo da, 18:30etik aurrera. Irabazle guztiak omendu ondoren, Maria Blancoren bakarriz­ketaz bukatuko da saioa.

ELEZ, lehiaketa ez ezik⁵, kultur eskaintza ere bada. Aurten, Elena Fernandez idazlea izan dute lagun antolatu diren solasaldietan⁶. Idazle barakaldarrak bere esperien­tziaz hitz egin die euskaltegietako ikasleei, eta istorioa ideia batetik abiatuta⁷ nola eraiki⁸ azaldu die. Trapagarango udal-euskaltegian, Abanton, Muskizko M aretoan, Ortuellan eta Trapagarango AEKn jaso dute idazlearen bisita.

1. Izkribu: idazlan, testu.
2. Bana: bakoitzak bat.
3. Hizpide: hitz egiteko gai, mintzagai.
4. Oroigarri: recuerdo (es), souvenir (fr).
5. Ez ezik: no solo... sino también (es), non seulement... mais (fr).
6. Solasaldi: charla (es), conversation (fr).
7. Abiatuta: partiendo (es), partant (fr).
8. Eraiki: construir (es), construire (fr).