Izarrak behatzeko aukera Arantzazun

Azaroaren 6an, Arantzazuko paraje berezia behatoki¹ astronomikoa bilakatuko da, Arantzazu Parketxean antolatutako behaketa-saioari esker. Jesus Arregi astrofisikari aretxabaletarraren gidaritzapean, ortzia² arakatzeko eta ezagutzeko aukera izango da, 19:00etatik aurrera. 

Izarrei begira, garai honetan zeruan ikus daitezkeen konstelazio eta planetak ezagutzeaz gain, Hego Tauridak izeneko izar iheskorrak³ behatzeko aukera ere izango da. Saioa parketxean bertan hasiko da, Arregik gure eguzki-sistema eta espazioa ulertzeko hainbat azalpen emanez. Ondoren, hark gidatuta, parte-hartzaileak kanpora irtengo dira, une horretan zeruan ikus daitezkeen izar eta konstelazioak ikusteko. Hego Tauriden meteoro-jarioaz⁴ gozatzeko tartea ere izango da, eta, zeruaren egoerak ahalbidetzen badu, baliteke izar uxoren⁵ bat edo beste ikusi ahal izatea.

Arestian esan bezala, behaketa 19:00etan hasiko da, Arantzazuko Parketxean. Parte hartzeko, helduek 8 euro ordaindu beharko dute, eta 8 eta 12 urte arteko haurrek, 6 euro. Partaide-kopurua mugatua denez, aurrez eman behar da izena. Antolatzaileek linterna, hotzerako arropa egokia
eta lurrean etzateko toalla edo estera eramatea gomendatu dute. Izena emateko eta/edo informazioa gehiago jasotzeko, 943 782 894 eta 699 335 183 telefono-zenbakietara dei daiteke, edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzi. www.gipuzkoanatura.eus guneak ere badu horretarako aukera.

1. Behatoki: observatorio (es), lieu d'observation (fr).
2. Ortzi: firmamento (es), firmament (fr).
3. Izan iheskor: estrella fugaz (es), étoile filante (fr).
4. Jario: flujo (es), flux (fr).
5. Izar uxo: izar iheskor.