‘Emakume zientzialarien argitan’ solasaldi-zikloa Donostian

Eguzki-eklipsea, lodifobia eta adimen artifizial kritikoa izango dituzte hizpide¹ Emakumeak zientzialarien argitan solasaldi²-zikloan, Donostian. Hiru saio izango dira, otsailetik apirilera bitartean, eta hirurak emakume zientzialariek eskainiko dituzte. Hain zuzen, emakume zientzialariak ezagutarazteko helburua du Elhuyarrek eta Donostia Kulturak elkarlanean antolatutako zikloak. Saio guztiak Donostiako Ernest Lluch Kultur Etxeko areto nagusian izango dira, euskaraz.

Interes sozialeko gaiak jorratuko dituzte solasaldietan, emakume zientzialariekin aurrez aurreko³ elkarrizketak eginez, Ana Galarraga Aiestaran Elhuyarreko zientzia-komunikatzaileak bideratuta.

Lehen saioa otsailaren 24an izango da, eta Virginia Garcia Pena (Pasai Donibane, 1979) astronomoa izango du protagonista. Eguzki-eklipse osoa, gertakari astronomikoa baino gehiago izenburuarekin, aurtengo abuztuaren 26an gertatuko den eguzki-eklipsea izango du ardatz. Izan ere, Euskal Herriko leku askotatik ikusi ahal izango da, eta solasaldiaren izenburuak dioen moduan, ikusmin⁴ handia piztu du mundu osoan.

Bigarren solasaldia Usue Mori Carrascal (Donostia, 1987) matematikan lizentziatuak eskainiko du, martxoaren 24an: Adimen artifiziala, begirada kritiko batetik. Adimen artifizialean aditua, EHUko irakasle agregatua da Konputazio Zientziak eta Adimen Artifiziala sailean, besteak beste, eta jardun akademikoaz harago ere lan handia egiten du adimen artifiziala gizartearen benetako beharretara egokitzeko.

Azkenik, hirugarren saioa apirilaren 28an egingo da. Mijo Lizarzaburu Garcia (Ondarroa, 1998) filosofo transfeminista eta lodiaktibista izango da hizlaria, eta lodifobiaz eta kontrol sozialaz mintzatuko da Lodifobia, gorputzen diziplinamendua eta kontrol soziala solasaldian.

Saio guztiak 19:00etan izango dira, eta Donostia Kulturaren DK Irratiko podcastetan eta Elhuyarren Emakume zientzialarien argitan podcastean ere entzun ahal izango dira.

1. Hizpide: hitz egiteko gai, hizketagai.
2. Solasaldi: elkarrizketa, berriketa.
3. Aurrez aurreko: presentzial.
4. Ikusmin: kuriositate, jakiteko gogo, jakin-min.