IX. Hitzen Lihoa egingo da Oiartzunen, ‘Haize kontra’ lelopean

Azaroaren 13tik 15era bitartean ospatuko da aurtengo Hitzen Lihoa. Ostiralean ekingo diote egitarauari, haizeari kontra¹ egiteko manifestu batekin, Harkaitz Canoren eskutik. Ondoren, Maite Larbururen emanaldia izango da Landetxe Kultur Aretoan.

Larunbat goizerako, berriz, kulturgintzaz gogoetatzeko² saio irekia antolatu dute. Antolakuntzako kideak hausnarketan aritu omen dira, gaur egungo kulturgintzan zertan sentitzen duten haize kontra dabiltzala, eta gogoeta horretan jasotako kezkak eta eztabaidagaiak ekarri dituzte egitaraura. Batetik,  “kultura herritarra vs kultura garaikidea” afera³ aukeratu dute, eztabaida betierekoari⁴ azkenaldian ertz berriak gehitu zaizkiola sumatuta: “Haize kontra egitea da, guretzat, balizko eztabaida bera auzitan jartzea⁵: dikotomia hori da eztabaidarako markoa ala dikotomia horren markoa bera da auzitan jarri beharrekoa?”. Bestetik, ezkerraren ikuspegitik “kultur ereduen inguruko afera bolo-bolo” dabilela-eta, ezkerraren kultur ereduaz hitz egingo dute: “Egungo jendartean, zein da ezker eraldatzailearen ikuspegitik proposatu nahi genukeen kultur eredu desiragarria? Kultur eredu bakarra beharrean, akaso batzuk dira aukerak? Kulturaren zer-nolako⁶ begiradak daude balizko⁷ kultur eredu horien atzean?”. Maialen Akizu, Edurne Azkarate, Paul Beitia eta Iratxe Retolaza jarriko dituzte haize bila, Landetxe Kultur Aretoan. Larunbatekoari amaiera emateko, Gartxoten kontzertua izango da: Bizirik gaude biraren barruan eskainiko du, Garazi Esnaolarekin batera. 

Igandean, jada ohikoa den egitaraua garatuko dute: goizez, liburu-azoka eta Katixa Agirreren Berriz zentauro liburuaren irakurketa jarraitua, Kontzejupean; eguerditik aurrera, bertso-bazkari literarioa eta bertso-saioa Maialen Lujanbio, Alaia Martin eta Aitor Servier bertsolariekin, eta gai-jartzaile Katixa Agirre bera.

Larunbateko saio irekirako izen-ematea eta igandeko bertso-saiorako sarreren erreserba Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean egin behar da.

1. Haize kontra: a contracorriente (es), à contre-courant (fr).
2. Gogoetatu: reflexionar (es), réfléchir (fr).
3. Afera: asunto (es), affaire (fr).
4. Betiereko: eterno, -a (es), eternel, -elle (fr).
5. Auzitan jarri: cuestionar (es), remettre en question (fr).
6. Zer-nolako: qué tipo de (es), quel, -elle genre de (fr).
7. Balizko: eventual (es), éventuel, -elle (fr).