Kito

Urdaibain ez da Guggenheim Museorik eraikiko. Museoko patronatukideek (Eusko Jaurlaritza, Bizkaiko Foru Aldundia eta Guggenheim Museoa) jakinarazi dutenez, proiektua bertan behera¹ utzi dute, behin betiko². Arrazoi bat nabarmendu dute erabakia hartzeko: Muruetako ontziolako lurzorua³ erabiltzeko korapilo juridikoa, denbora gehiegi beharko litzatekeelako egitasmoa garatzeko. Guggenheim Urdaibai Stop plataformak bestelako argudioak aipatu ditu, ordea: kalte ekologikoak (biosfera erreserba da Urdaibai) eta herritarren presioa. Izan ere, proiektuak kontrako iritzi ugari piztu ditu hasieratik, baita kultur eragile ugarirenak ere. Herritarren garaipentzat hartuta, beraz, plataformak ospakizun eguna antolatuko du Gernika-Lumon otsailaren 7rako. Hainbat urteren ostean, askatu da korapiloa, baina hari mutur⁴ asko utzi ditu matazak⁵: zer-nolako kultur politikak ditugun; turismo ereduak; gobernantza moduak... Museoetako bisitek bisitariarengan bezala, arrastorik utziko ote du aferak⁶ tartean ibili diren guztiengan?

1. Bertan behera utzi: abandonar (es), abandonner (fr).
2. Behin betiko: definitivamente (es), définitivement (fr).
3. Lurzoru: suelo (es), sol (fr).
4. Hari mutur: cabo (es), bout (fr).
5. Mataza: embrollo (es), imbroglio (fr).
6. Afera: gatazka, auzi, arazo.