Unitree G1 EDU, Txagorritxuko lagun berria

Txagorritxuko Ospitaleko Pediatria arloan lankide berri bat daukate, Saaki proiektuari esker. Unitree G1 EDU du izena eta giza itxurako¹ robota da, 9-11 urteko haurren tamainakoa: 130 zentimetroko altuera eta 35 kiloko pisua. Egileen ustez, neurri horiek haurren eta robotaren arteko harremana errazten dute, eta umeak ez dira beldurtzen. Robotak hainbat lan egiten ditu: paziente txikiak entretenitu, haien antsietatea arindu² eta laguntza emozionala eman, ospitalean dauden bitartean. Nola egiten du? Bada, prozedura medikoak modu errazean azaltzen ditu, talde jardueretan³ parte hartzen du haurrekin batera eta eguneko hainbat unetan haiekin egoten da. Saaki proiektua Bioaraba Institutuak, Osakidetzako Arabako Erakunde Sanitario Integratuak eta Vital Fundazioak bultzatu dute.

1. Giza itxura: apariencia humana (es), apparence humaine (fr).
2. Arindu: aliviar (es), alléger (fr).
3. Talde jarduera: actividad grupal (es), activité de groupe (fr).