Primate pozoitsu bakarra dago munduan

Loris nagia¹ da munduko primate pozoitsu² ezagun bakarra. Haren hozkaren³ pozoiak alergia eragin⁴ ahal du, eta pertsona bat minutu gutxian hil. Animalia honek guruin⁵ berezi batzuk dauzka beso azpian eta pozoia sor­tzen dute miazkatzen⁶ dituenean. Substantzia toxiko horri esker, loris nagiaren hozka hilgarria da. Medikuentzat ezagunak dira Borneoko 30 urteko gizon baten eta 37 urteko emakume japoniar baten kasuak, hilzorian egon⁷ zirelako.
Loris nagia ezaguna da Interneten, itxura⁸ maitagarria eta hauskorra⁹ duelako. Pertsona asko maskota gisa¹⁰ erosten saiatzen dira, arriskuak ezagutu gabe. Batetik, legez kanpoko¹¹ trafikoa da, loris nagia desagertzeko arriskuan dagoelako. Bestetik, animalia basatia¹² da, beraz, ezin da etxe barruan bizi. Gainera, funtsezko¹³ rola bete­tzen du Asiako hegoaldeko ekosistemetan. 

Non bizi da?
Asiako hegoaldean.
Nolakoa da?
Iletsua, buru borobila, mutur motza, begi handiak...
Besoak eta hankak, luzera ia berdinekoak.
Neurria: 18 eta 39 cm artean. Pisua: 300 eta 2.100 g artean.
Zer jaten du?
Landareen izerdia¹⁴, fruituak, nektarra eta intsektu txikiak. Pozoia ez du erabiltzen beste animalia batzuk akabatu¹⁵ eta jateko, borrokarako baizik.

1. Nagi: perezoso, -a (es), paresseux (fr).
2. Pozoitsu: venenoso, -a (es), vénéneux, -euse (fr). 
3. Hozka: mordedura (es), morsure (fr).
4. Eragin: provocar (es), provoquer (fr).
5. Guruin: glándula (es), glande (fr).
6. Miazkatu: lamer (es), lécher (fr).
7. Hilzorian (egon): agonizar (es), agoniser (es).
8. Itxura: aspecto (es), aspect (fr).
9. Hauskor: frágil (es), fragile (fr).
10. Gisa: como (es), comme (fr).
11. Legez kanpoko: ilegal (es), illégal (fr).
12. Basati: salvaje (es), sauvage (fr).
13. Funtsezko: fundamental (es), fondamental, -e (fr).
14. Izerdi: savia (es), sève (fr).
15. Akabatu: matar (es), tuer (fr).