Haragikien iragarkiak debekatu dituzte Amsterdamen

Maiatzetik aurrera, haragi¹-produktuen iragarkiak² desagertu egingo dira Amsterdam hirian, Herbehereetan. Munduko lehen hiriburua³ da horrelako neurria hartzen. Zehazki, eremu publikoetan eta garraio-sarean⁴ debekatuko dituzte. Haragia saltzen duten dendetan, aldiz⁵, ez. Horiek iragarkiak jarri ahal izango dituzte erakusleihoetan⁶ edo lokalen ondoan, adibidez. Amsterdameko udal-batzordeak⁷ hartu du erabakia, eta bi arrazoi nagusi ditu. Batetik, ingurumena⁸, haragiaren ekoizpenak⁹ kutsadura handia sortzen duelako. Esaterako, berotegi-efektuan¹⁰ eragin handia du, gas asko isurtzen¹¹ dituelako. Bestetik, osasuna: Amsterdameko hiritarren dieta osasungarria¹² izateko, janari begetalak sustatu¹³ nahi dituzte. Beste produktu oso kutsatzaile¹⁴ batzuen iragarkiei ere eragin¹⁵ die debekuak. Esate baterako, hegaldien¹⁶, itsas bidaien edo gasolina behar duten autoen iragarkiei.

1. Haragi: carne (es), viande (fr).
2. Iragarki: anuncio (es), annonce (fr).
3. Hiriburu: capital (es), capitale (fr).
4. Garraio-sare: red de transporte (es), réseau de transport (fr).
5. Aldiz: por el contrario (es), par contre (fr).
6. Erakusleiho: escaparate (es), vitrine (fr).
7. Udal-batzorde: consejo municipal (es), conseil municipal (fr).
8. Ingurumen: medio ambiente (es), environnement (fr).
9. Ekoizpen: producción (es), production (fr).
10. Berotegi-efektu: efecto invernadero (es), effet de serre (fr).
11. Isuri: emitir (es), émettre (fr).
12. Osasungarri: saludable (es), salubre (fr).
13. Sustatu: impulsar (es), impulser (fr).
14. Kutsatzaile: contaminante (es), polluant, -e (fr).
15. Eragin: afectar (es), affecter (fr).
16. Hegaldi: vuelo (es), vol (fr).